Орто Халыма куорат дьиэлэригэр баһаартан сэрэтэр прибордары туруораллар
Орто Халыма улууһугар СӨ баһаартан утары судаарыстыбаннай сулууспа баһаарынай чааһын үлэһиттэрэ элбэх кыбартыыралаах дьиэлэргэ баһаартан сэрэхтээх буолууга үлэ ыыталлар. Кинилэр бэйэлэрин көҕүлээһиннэринэн куорат сорох дьиэлэригэр баһаар туһунан биллэрэр прибордары туруораллар. Маннык хабааннаах үлэ эрдэ 53 ыалга ыытыллыбыта. Кинилэр дьиэлэригэр прибордары босхо туруорбуттара. Оттон билигин фенолтан тутуллубут 10 дьиэҕэ туруора сылдьаллар. Прибордар „СӨ Судаарыстыбаннай баһаартан утары сулууспа“ СӨ ГБУ нөҥүө хааччылыннылар. Баһаартан сэрэтэр прибор батарейканан үлэлиир, ол 1-1,5 сылга диэри туһалыыр. Тэрил буруо билиннэ даҕаны тута сигнал биэрэр. Онон, дьиэлэр подъезтарыгар, көрүдүөрдэригэр биирдии-иккилии, уопсайа биир дьиэҕэ 8-10 прибор туруоруллар. Маннык прибор Дьокуускайга маҕаһыыннарга удамыр сыанаҕа атыыланар буолан, чааһынай дьон бэйэтэ эмиэ дьиэтигэр туруорунуон сөп диэн исписэлиистэр этэллэр. 1 из 2 Баһаарынай чаас начаалынньыга Владимир Тарасов: «Маннык үлэни, бастатан туран, фенол булкадыһыктаах тутуу матырыйаалыттан оҥоһуулаах дьиэлэртэн саҕалаатыбыт. Салгыы прибордары сакаастаан атын элбэх кыбартыыралаах дьиэлэргэ туруоруохпут. Сатаннаҕына, нэһилиэктэргэ эмиэ туруорар былааннаахпыт», — диэтэ. Прибору туруорар үлэһиттэр хас биирдии дьиэ старостатыгар прибор хайдах үлэлиирин сиһилии быһааран баран аактаҕа илии баттаталлар. Санатан эттэххэ, баһаарынай чаас үлэһиттэрэ уонна инструктор элбэх кыбартыыралаах уонна оһоҕунан оттуллар чааһынай дьиэлэргэ сыл ахсын сылдьан электроприбордары бэрэбиэркэлииллэр, хаһаайыттарга инструктаж, өйдөтүү үлэтин ыыталлар. Кинилэр нэһилиэктэргэ тэриллибит баһаарынай дружиналары кытта бииргэ үлэлэһэллэр. Баһаарынайдар үлэлэрин таһынан уопсастыбаннай үлэҕэ, спорка көхтөөхтүк кытталлар. Билигин кулун тутар 27 күнүгэр Муома улууһугар баһаартан утары сулууспа үлэһиттэрин ортолоругар ыытыллыахтаах III-с Спартакиадаҕа кыттарга бэлэмнэнэ сылдьаллар.
