Тыа сирин иһэр уу кыһалҕатын дьүүллэстилэр

Ыам ыйын 19 күнүгэр Өрөспүүбүлүкэтээҕи Медиа-кииҥҥэ «Тыа сиригэр иһэр уу кыһалҕата» тиэмэҕэ «төгүрүк остуол» ыытылынна. «Уопсай кыһалҕабыт» бырайыак чэрчитинэн ыытыллыбыт тэрээһиҥҥэ: СӨ Судаарыстыбаннай Мунньаҕын (Ил Түмэн) норуодунай дьокутаата Юрий Баишев; Дьиэ-уот коммунальнай хаһаайыстыба министиэристибэтин коммунальнай тиһиккэ уонна стратегия сайдыытыгар департаменын салайааччы Виктор Романов; Тыа хаһаайыстыбатын министиэристибэтин тыа сирин сайдыытыгар департаменын салайааччыны солбуйааччы Анатолий Павлов; Роспотребнадзор Саха сиринээҕи управлениетын санитарнай көрүүгэ, лицензиялааһыҥҥа уонна регистрациялааһыҥҥа отделын начальнига Маргарита Корнилова; Уус Алдан улууһун Дүпсүн нэһилиэгин баһылыга Ивамар Соловьев; Нам улууһун «Возрождение» ХЭП дириэктэрэ Зоя Ядреева; Уус Алдан улууһун Дүпсүн нэһилиэгин олохтооҕо Иван Босиков, Анна Пухова, «Саха сирэ» хаһыат эрэдээктэрин солбуйааччы Прокопий Бубякин, суруналыыстар Раиса Сибирякова, Надежда Егорова, «Киин куорат» хаһыат эрэдээктэрэ Иван Ушницкай кытыннылар. «Төгүрүк остуолу» хаһыат ырытааччы-суруналыыһа Анивера Акимова иилээн-саҕалаан ыытта. А.Акимова бэлиэтээн эппитинэн, өрөспүүбүлүкэ нэһилиэктэрин 80-ча бырыһыана санитарнай ирдэбилгэ эппиэттээбэт ууну иһэн олорор. Онон, нэһилиэнньэлээх пууннарга иһэр уу боппуруоһа тыын суолталаах. 1 из 3 Маргарита Васильевна кэпсэтиини өрөспүүбүлүкэҕэ иһэр уу хаачыстыбатыттан саҕалаата. Өрөспүүбүлүкэҕэ уу хаачыстыбата органическай көрдөрүүлэринэн 28 бырыһыаҥҥа тэҥнэһэр буоллаҕына, бу көрдөрүү тыа сиригэр 23 эрэ бырыһыаҥҥа тэҥнэһэр. Уу хаачыстыбата мөлтөҕө ууну ыраастыыр уонна инфекцияны суох оҥорор тэриллэр суохтарын, водозабордар тутуллубаттарын кытары сибээстээх. «Төгүрүк остуол» кыттыылаахтара иһэр уу тула кэпсэтиилэрин, дьүүллэһиилэрин «Саха сирэ» хаһыат муус устар 24 күнүнээҕи нүөмэригэр уонна «Эдэр саас» сайтка ааҕыҥ.