Алтынньы 12 күнүгэр Тиксии бөһүөлэгэр маҥнайгы нүөмэрдээх орто оскуолатын 80 үбүлүөйдээх сааһын бэлиэтээн аастылар. Үбүлүөй учууталларга уонна урукку оскуола выпускниктарыгар ахтыы күнүнэн буолла. Хайыы-үйэҕэ 80 сыл биллибэттик ааһа охсубут. Учууталлары, үөрэнээччилэри үөрүүлээх күнүнэн эҕэрдэлээтилэр ытыктабыллаах ыалдьыттар – Булуҥ улууһун баһылыга Игорь Кудряшов, Тиксии бөһүөлэгин баһылыга В.В. Усачев, Булуҥ улууһун депутаттарын Сэбиэтин бэрэссэдээтэлэ Леонид Калимбет, үөрэх управлениетын салайааччыта Вероника Федулова, дьиэ кэргэҥҥэ уонна оҕолорго социальнай көмө киинин дириэктэрэ Татьяна Асаева, төрөппүттэр кэмитиэттэрин бэрэстэбиитэллэрэ, элбэх оскуола доҕотторо уонна кини бииргэ алтыһан үлэлиир дьоно. 1 из 11 Үөрэнээччилэр уонна оскуола коллектива ыллаан, үҥкүүлээн ыалдьыттарга бэлэх ууннулар. Оскуола выпускниктара эҕэрдэ киинэ көрдөрдүлэр. Ыҥырыылаах ыалдьыттар педагогтары эҕэрдэлээн, туох баар кэрэни баҕаран туран махтал суруктары, бочуотунай грамоталары туттартаатылар. Бу күн истиҥ-иһирэх тыллар учууталлар аадырыстарыгар элбэхтэ этилиннэ. Төһө да 80 сыл аастар оскуола үүнэ-сайда турар. Учууталлар хаачыстыбалаах үлэлэрин көмөтүнэн оскуолаҕа ураты эйгэ үөскүүр, хас биирдии үөрэнээччи бэйэтин талаанын арыйар. Уонна бу үлэ үчүгэй түмүгэ – үөрэнээччилэр биһирэбиллэрин уонна тапталларын ылыы буолар.
