«Шинель» испэктээги экпертэр сыаналаатылар

Ньурбатааҕы театр Николай Гоголев айымньытынан «Шинель» испэктээги дьон дьүүлүгэр туруорбута. Испэктээги «Маска Плюс» Арассыыйа национальнай театральнай бириэмийэтин, «Золотая маска» театральнай кириитиктэрэ Вера Сенькина уонна Андрей Пронин экперт быһыытынан сыаналаатылар. — Ньурбатааҕы көһө сылдьар драматическай театр үбүлүөйдээх сылбытын «Сата» фестивалынан саҕалаабыппыт,- диир СӨ искусствотын үтүөлээх деятелэ, театр салайааччыта Юрий Алексеевич Макаров. Фестивалга Москваттан театральнай кириитик Анна Бонацюкевич ыҥырыылаах ыалдьыт быһыытынан сылдьан, «Шинель» испэктээги туруоралларыгар этии киллэрбит. Арассыыйа регионнарын барытын хабар экспертэр үлэлээн, номинаннары талбыттар. Атырдьах ыйын 22 күнүгэр, биэс уон сыл анараа өттүгэр, Ньурбаҕа театр аһыллыбыт күнүгэр 1966 с. театр быыһын бастаан аспыт артыыстары ыҥыран улахан мероприятие тэриллибит. Үбүлүөйүнэн сибээстээн «Көрөөччү сүрэҕэр тиийээри» кинигэни, «Нюрбинский театр» фотоальбом оҥотторбуттар. Ахсынньы ыйга Ньурба театрын артыыстарын тустарынан библиографическай справочник тахсыахтаах. Дьокуускай куоракка ахсынньы ыйга үбүлүөйдээх мероприятие түмүктэниэхтээх. Инникитин урут уонна билигин үлэлии сылдьар артыыстар төрөөбүт сирдэринэн гастроллуур былааннаахтар. «Золотая маска» 23-с национальнай бириэмийэни туттарыы Москуба куоракка кэлэр сыл олунньу-муус устар ыйдарга, чуолаан, муус устар 19 күнүгэр бириэмийэни туттарааһын буолуоҕа. Барыта 25 араас куораттан 69 театр кыттыбыттарыттан, 74 испэктээк көрдөрүллүбүтүттэн, Арассыыйа сүүмэрдээн 7 испэктээги талбыт. Ол иһигэр Ньурбатааҕы көһө сылдьар драматическай театр ыҥырыы суругу тутта.