Орто Халыма музейа үбүлүөйүн көрсөөрү бэлэмнэнэр

Сотору кэминэн Кыраайы үөрэтэр музей 95 сыллаах үбүлүөйүн бэлиэтиэҕэ. Бу бэлиэ түгэни көрсө эрдэттэн бэлэмнэнии үлэтэ барбыта, былаан ылыллыбыта. Историяны түмүүгэ анаан музей сайта оҥоһулунна. Бу сайт салгыы сайдан, үгүс чахчылары түмүөхтээх. Ханна да сырыт, www.kuluma.ru аадырыһынан киирэн, төрөөбүт улууспут историятын кытта билсиэххэ сөп. Эрдэ биллэриллибитин курдук,эмблеманы оҥорууга, «Бастыҥ коллекционер» уонна «Бастыҥ экспонат» куонкурустар ахсынньы 1 күнүгэр диэри салҕаналлар. Тэрийээччилэр нэһилиэктэн кыттааччылары өйдөөн, хаартысканан үлэлэри ылаллар, маныаха Сыбаатай, Арҕахтаах, Ойуһардаах коллекционердара көхтөөхтөрүн бэлиэтииллэр. Оттон куорат олохтоохторо тугу сөбүлээн мунньалларын музейга бэйэтигэр дьон дьүүлүгэр таһаарбыттара. Манна араас фарфоровай статуэткалар, значоктар, магниттар, бэл диэтэр улуу сирдьиппит Владимир Ленин бюстара кытта бааллар. 1 из 3 Бу күннэргэ тэрилтэ үлэтин туһунан слайда оҥоһуллар, Дьокуускай куоракка брошюра бэчээккэ ыытыллыбыта. Үбүлүөйдээх тэрээһин сүрүн чааһа, үлэһиттэри чиэстээһин, эҕэрдэлэр, куонкурустар кыайыылаахтарын наҕараадалааһын ахсынньы 15 күнүгэр «Кулума» кииҥҥэ ыытыллыаҕа. Онтон ахсынньы 16 күнүгэр «Ночь в Музее» киэһэтэ күүтэр. Манна киирбит билиэттэринэн лотерея оонньонуоҕа, слайда көрдөрүллүөҕэ, викторина тэриллиэҕэ, оҕолорго урукку мультиктар көстүөхтэрэ, ону кытта култуура үлэһиттэринэн театрализованнай шоу толоруллуоҕа. Кэлин бары тэрээһиннэр түмүктэринэн өйдөбүнньүк хаартыскалардаах, видеолаах дискэлэр оҥоһуллуохтара.